Reforma Zgjedhore, arrihet konsensusi: Riformatim KQZ-së

Mësohet se palët kanë rënë dakord për disa nga çështjet të cilat mbanin të bllokuar përmbylljen e Reformës Zgjedhore, siç janë riformatimi i KQZ-së, ankimimi dhe teknologjia e numërimit. Për sa i përket çështjes së KQZ-së, duket se mazhoranca ka pranuar kërkesën e PS-së për riformatimin e plotë të Komisionit Qendror të Zgjedhjeve, gjë që pritet të bëhet në muajin shtator, pas përfundimit të mandatit të komisionit aktual.  Burime të NEWS24 bëjnë të ditur se palët kanë rënë dakord edhe për zgjedhjen me konkurs të kreut të Komisionit Qendror të Zgjedhjeve si dhe për kontrollin elektronik të kartave të identitetit për Tiranën. Tjetër pikë e rëndësishme është dakordësimi për çështjen e ankimimeve. Palët kanë rënë dakord që 2 anëtarë të KQZ-së të kenë të drejtë të kërkojnë transparencën. Drafti përfundimtar pritet të përfundohet dhe të zbardhet pasditen e sotme, rreth orës 17:00, në mbledhjen e fundit të komisionit parlamentar të Reformës Zgjedhore. 12 korriku ishte përcaktuar si afati zyrtar i mandatit të punës së komisionit të Reformës Zgjedhore, i caktuar nga Kuvendi. Bw